Sipas thashethemeve të fundit, Rockstar është duke u përgatitur të publikojë një remaster të GTA 4 për konsolat moderne si PS5 dhe Xbox Series X/S më vonë këtë vit. Burimi i informacionit është Tez2, një burim i njohur brenda komunitetit Rockstar, i cili shkroi në forumin e GTA se një punonjës i Rockstar ka “lënë të kuptohet” për prezantimin e këtij versioni dhe se zhvillimi i tij tashmë ka një vit që ka filluar.
Ky version mendohet të jetë një nga arsyet pse Rockstar ndërpreu projektin e fansave Liberty City Preservation Project, që do të sillte hartën e GTA 4 në GTA 5. Nëse kompania ndjek planin e saj që daton që nga periudha e pandemisë, një version i Max Payne 3 pritet të pasojë atë të GTA 4. Tez2 përmendi gjithashtu mundësinë e një pakete “Definitive Edition” që do të përfshijë remaster-et e Max Payne 1 & 2 dhe atë të lojës së tretë.
GTA 4 është vendosur në Liberty City, një version i trilluar i Nju Jorkut, dhe gjithashtu qyteti i origjinës së Lucia Caminos, protagonistes së GTA 6. Kështu, një version i ri i GTA 4 para publikimit të GTA 6 (më 26 maj 2026 për PS5 dhe Xbox Series X/S) mund të jetë një mënyrë për të mbajtur lojtarët të angazhuar dhe për të ndërtuar kontekst rreth personazhit të ri.
Në kohën e publikimit të saj në 2008, GTA 4 u vlerësua si një “blockbuster që theu kufijtë”, duke u konsideruar si një moment historik në industrinë e lojërave.
