Sony Group po planifikon rritjen e prodhimit të konsolave PS5 në një shkallë të paprecedentë pasi mungesa e proçesorëve gjysëmkonduktorë në treg limitoi aftësitë e kompanisë.

“Ne po planifikojmë një rritje shumë të madhe të prodhimit, e cila do të na çojë në nivele prodhimi që nuk janë arritur asnjëherë më parë.” tha CEO Jim Ryan, gjatë mbledhjeve të informimit të investitorëve.

Sony planifikon të rrisë shitjet globale me 57% në 18 milionë njësi për vitin fiskal që përfundon në mars të 2023. Mungesa e produkteve bazë dhe proçesorëve pritet të shkaktojnë disa probleme, por “situata po përmirësohet” tha Jim Ryan.

Meqë numri i pajisjeve të prodhuara do të rritet në mënyrë të menjëhershme, pritet që dhe shitjet të rriten po në të njejtën mënyrë. Deri në fund të vitit fiskal në 2023 (i cili do të jetë viti i 4-t që nga lançimi i PS5), pritet që numri i konsolave të shitura të tejkalojë shitjet e konsolës paraardhëse (PS4) për të njejtën periudhë.

PS5 prodhohet në Kinë dhe në Japoni. Për t’u mbrojtur nga rreziqet në vendet e prodhimit, Sony tregoi se ka siguruar materialet bazë nga disa furnizues të ndryshëm. “Për të zgjeruar prodhimin, është e rëndësishme të promovohet bashkëpunimi për sigurimin e materialeve me segmentet prodhuese të proçesorëve gjysëmkonduktorë dhe pjesëve elektronike.” u shpreh Yoshiharu Izumi.