Adoleshenti me origjinë shqiptare, Arion Kurtaj, i cili jeton në Londër arriti të aksesonte informacionet sekrete të GTA VI përmes një Amazon Fire Stick ndërkohë që ishte në një hotel.
Kurtaj ishte një anëtar i grupit të krimit kibernetik i njohur si Lapsus$, i cili ishte përgjegjës për hakerimin e Nvidia, Uber, Revolut. Publikimi i materialeve të GTA 6 është ajo për të cilën njihen më shumë Kurtaj dhe Lapsus$, duke zbuluar informacione kyçe si vendndodhja e saj dhe se do të kishte dy protagonistë. Kurtaj më vonë do të përpiqej të shantazhonte Rockstar Games duke kërcënuar se do të lëshonte source code të GTA 6, në të cilin kishte fituar akses.
Sipas dokumenteve gjyqësore të publikuara, 18-vjeçari Arion Kurtaj u “kap në flagrancë” kur policia e qytetit të Londrës kontrolloi hotelin e tij Travelodge – ku ai mbahej me kusht pas arrestimit të tij në mars 2022 pasi ishte pjesë e sulmit kibernetik ndaj Nvidia. Megjithatë, duket se ai ende nuk ka mësuar nga këto gabime, pasi ka treguar se ka si qëllim të vazhdojë të kryejë krime kibernetike pasi të përfundojë dënimin e tij.
Në një videotelefonatë në seancën gjyqësore u zbulua nga mjekja psikiatër Claudia Camden-Smith se gjatë një vlerësimi, Kurtaj kishte deklaruar qëllimin e tij për t’u kthyer në jetën e tij të krimit pas lirimit. Kurtaj tani është duke u vlerësuar për gjendjen e tij mendore prej 12 javësh në spital, pasi ka pretendime se ai vuan nga sëmundje mendore.
Duket se gjithë këto situata të papritura nxitën Rockstar Games që të pranojë ekzistencën e GTA 6 dhe të publikojë trailer-in para kohës së parashikuar.
