Kina ka vendosur të shtrëngojë masat ekzistuese që kanë si qëllim uljen e numrit të orëve që njerëzit shpenzojnë para kompjuterit duke luajtur lojëra. Për të arritur këtë qëllim, ato kanë vendosur që versioni kinez i Fortnite, i quajtur “Fortress Night”, të fikë serverat duke filluar nga data 15 nëntor.
Ndërkohë përdoruesit e rinj që dëshironin të krijonin një adresë të re në këtë video-lojë e kishin të pamundur të regjistroheshin që nga data 1 nëntor. Epic nuk ka dhënë një arsye specifike se pse kjo gjë do të ndodhë në tregun kinez.
Fortress Night u lançua në 2018 përmes një partneriteti me Tencent. Kjo kompani gjigande me bazë në Shenzen është investitore e rëndësishme në Epic, ku ka në dorë 40% të aksioneve të kompanisë.
Teknikisht kjo lojë nuk pati kurrë një lançim të plotë në Kinë, pasi deri më tani ajo mund të luhej përmes një “Test” mode, ku nuk përfshiheshin disa nga shërbimet në versionin kryesor si in-app purchases.
Më herët gjatë këtij viti, Pekini prezantoi disa masa shtrënguese në lidhje me fenomenin gaming që kishte “pushtuar” kohën e lirë të fëmijëve. Atë kohë qeveria vendosi që të limitonte kohën që fëmijët nën 18 vjeç shpenzojnë para lojërave në vetëm 3 orë në javë.
