Përveç zjarrit në të cilin Ubisoft ndodhet aktualisht, edhe eventi i fundjavës ishte shumë i nxehtë, për mirë kësaj radhe.
Mes titujsh të shumëpritur, në Ubisoft Forward u prezantuan edhe pamjet e para të Far Cry 6 dhe dyshimi disa mujor për pjesëmarrjen e Giancarlo Espositos u konfirmua më në fund.
Aktori i serialit më të mirë në botë Breaking Bad, kish hedhur fjalë më parë për përfshirjen e tij në një titull kryesor. Fansat e thekur nuk vonuan të dilnin në konkluzione, të cilat rezultuan të sakta.
Në videon prezantuese Esposito shfaqet si një karakter i errët i cili lekturon një djalë të ri mbi artin e mbajtjes së pushtetit. Talenti dramatik i një aktori të të tilla përmasave do i japë lojës shumë shije, për këtë jemi të bindur, kush mundet ta harrojë Gus Fring dhe cinizmin e tij të akullt.
Megjithatë ky nuk është thelbi, materialet video dhe foto tregojnë rëndësinë e vërtetë të evenimentit, Far Cry 6 do të sjellë cilësi në rezolucion si asnjëherë tjetër. Screenshot-et e lëshuara nga Ubi tregojnë ambiente më të detajuara, saktësi më të lartë në format vizuale.
Të gjitha këto duhet të duken si asgjë më parë kur të luhen në konsolet e gjeneratës së ardhshme. E meqenëse do të dalin njëkohësisht me PS5 dhe Xbox Series X pritet që potenciali i tyre të shfrytëzohet edhe për dinamika më të fuqishme, aksioni duhet të jetë i një niveli tjetër. Por përveç disa armatimeve të reja asgjë nuk dihet për këtë aspekt.
Fansave do tu duhet të presin edhe së paku 6 muaj deri në daljen e lojës, por sidoqoftë do të jetë një periudhë mjaft intense për konsolet dhe lojrat bashkë.
Far Cry 6 do të vijë për PS4, PS5, Xbox One, Xbox Series X, dhe PC në 18 Shkurt 2021.
