Ditën e djeshme zhurmat për një Assassin’s Creed në kohën e vikingëve u konfirmuan me anë të një projekti Photoshop të njërit prej posterave fillestar të AC Valhalla.
Sot kemi edhe pamjen e parë të kinematografisë së lojës dhe jemi të bindur se Ubisoft sa vjen edhe e përmirëson këtë emër duke tërhequr drejt vetes miliona fansa në secilin edicion.
Konteksti historik i lojës ka të bëjë me konliktin e gjatë midis Vikingëve dhe mbretërive Angleze ndaj po hamendësojmë se ngjarjet zhvillohen midis shekullit VIII dhe X.
Protagonisti quhet Eivor, një lider i fuqishëm Viking i cili udhëheq ushtrinë e tij nga brigjet e ashpra të Norvegjisë drejt tokave pjellore Angleze drejt lavdisë për të marrë një vend në Valhalla.
Sa i përket botës ku do të zhvillohet shqetësimi i parë i fansave ka të bëjë me nivelet e ndërtesave të kohës të cilat ndoshta do të kufizojnë aspektin më të dashur të lojës: parkour.
Por kjo nuk ishte problem për AC Origins e cila zhvillohej në Egjiptin e lashtë ndaj përkundrazi pritet të jenë perfeksionuar e ndoshta edhe shtuar stile të reja.
Përveç tokave të magjishme një detaj shumë i bukur i serisë është deti, aset i rëndësishëm që ka të bëjë me aftësinë e të lundruarit, mjaft i pëlqyer tek AC Rouge dhe Black Flag dhe vazhdimisht i kërkuar nga fansat.
Megjithëse në trailer nuk jepet asnjë shenjë dyluftimi mes anijeve, vikingët mbahen si detarë të zotë ndaj do të ishte mëkat të mos kishim aksion në këtët drejtim.
Opsioni i artizanatit kësaj here është gjithashtu risjellë nga Rogue pasi jo vetëm restaurime ndërtesash por qytete të tëra mund të themelohen nga heroi ynë, duke inkasuar kështu të ardhura të vazhdueshme.
Eivor, vrasësi viking, me flokët e gjata bjonde dhe gërshetë tipike, ka një trup më të bëshëm se sa vrasësit klasik të AC. I veshur me lekurët kohës, për tu mbrojtur nga i ftohti dhe i mirë karikuar me armë ndër të cilat edhe dy sopata të fuqishme vikinge duke na risjellë pak nga shija keltike e God of War.
Sulmet në grup indikojnë se ndoshta lufta solo do të jetë më e reduktuar, por duke njohur pikat e forta të dinamikës tradicionale të Assassin’s Creed presim një ekuilibër të shëndetshëm mes njërës dhe tjetrës.
Thika ikonë e asasinëve pati një moment të gjithin të dedikuar në këtë trailer.
Në mes të betejës për të pushtuar brigjet e Anglisë, Eivor-it i shfaqet një vegim; një figurë misterioze dhe e kërrusur e cila kthehet në shqiponjën kult të assassinëve kjo bën që heroi ynë të marrë bekimin e Odin-it. Drejt tij vjen një kundërshtar i kategorisë “Brute” dhe armët e Eivorit duket se nuk i bëjnë dot gjë këtij Anglezi të stërmadh me mburoja të përforcuara. Dhe kur i çarmatosur nga kundërshtari mendojmë se është fundi i heroit tonë thika e kyçit ngulet në qafën e kundërshtarit duke na rrëqethur mishin të gjithëve.
Në fund të video premierës përshëndetemi nga logo e Xbox çka na solli dyshime se ndoshta Assassin’s Creed Valhalla do të jetë ekskluzivitet i kësaj konsole.
Por pas një lundrimi të shpejtë në faqen zyrtare të Ubisoft, shpirtrat bien në qetësi pasi Valhalla do të jetë i disponueshëm për Xbox Series X, Xbox One, PS5, PS4, Stadia dhe PC.
Data e lëshimit: pushimet 2020.
(Do të kemi pushime këtë vit?)
