Me sa duket Amazon ka shumë besim në përshtatjen e historisë së God of War në një serial, pasi ka porositur krijimin e dy sezoneve.
Kjo gjë u bë e ditur nga Ronald D. Moore, një shkrimtar dhe producent shumë i suksesshëm televiziv, i cili aktualisht po mbikëqyr rrugëtimin e Kratos, edhe pse ai nuk merr vesh aspak nga videolojrat. Gjatë një interviste në The Sackhoff Show me Katee Sackhoff, ai tregoi:
“Tani për tani jam duke punuar në përshtatjen e kësaj video loje të quajtur God of War, që Amazon ka porositur dy sezone dhe më kërkuan të hyja, jam literalisht në dhomën e shkrimtarëve dhe kjo është puna ime e re”, thotë ai. Duke mos luajtur videolojëra që prej viteve ’80, Moore u shpreh se ky është një drejtim krejtësisht i ri i punës së tij.
Ai pranon se provoi të luante God of War, por zbuloi se stilet e veprimit në lojë ishin tepër të vështira për t’u mësuar nga ana e tij. “Kontrolluesit tani…” ai qesh. “Më thonë të shtyp R1, por unë se di se çfarë është R1!”
Fillimisht ishte ekipi i Mark Fergus, Hawk Ostby dhe Rafe Judkins që u fut për të nisur procesin e shkrimit, por që përfundimisht u largua në vitin 2024.
Moore ka zhvilluar disa seriale hit, duke përfshirë një remake të Battlestar Galactica, Outlander dhe For All Mankind, dhe ka kontribuar me dhjetëra episode në Star Trek: The Next Generation, Voyager dhe Deep Space Nine. Ai e di se si të realizojë një projekt të madh televiziv, si dhe një ose dy gjëra për t’u siguruar që seriali të qëndrojë në rrugën e duhur, pasi shumica e asaj që ai ka punuar ka zgjatur shumë sezone.
Prodhimi nisi hapat e parë në vitin 2022, në një bashkëpunim midis Amazon, Sony dhe PlayStation Productions.
