Lajmi se TikTok nuk do të jetë më i aksesueshëm në Shqipëri bëri xhiron e internetit para disa javësh, pasi një gjë e tillë u lajmërua nga vetë kryeministri gjatë prezantimit të Planit të ri të Veprimit në Shkolla. Ky plan do të përmbajë disa masa që do të merren për të rritur sigurinë në institucionet arsimore, dhe një prej masave do të jetë ndalimi i funksionimit të TikTok për të paktën një vit.
Duhet theksuar se problemi për mbylljen e TikTok në Shqipëri nuk qëndron në sigurinë tonë kombëtare, si në SHBA, por në përmbajtjet plot banalitet të shpërndara në këtë platformë nga përdoruesit shqiptarë.
Ditën e martë kryeministri Edi Rama bërinjë takim me Christine Grahn, drejtuesen e Marrëdhënieve me Qeveritë dhe Politikat Publike të TikTok për Evropën. Z. Rama tregoi përmes një postimi në Facebook se në këtë takim u shtruan shqetësimet që çuan në marrjen e një vendimi të përkohshëm për ndalimin e aksesit të TikTok, si dhe mundësinë e adresimit të këtyre shqetësimeve.
“Një diskutim plotësisht i hapur dhe me frymë konstruktive, ku vendosëm disa piketa bashkëpunimi në javët e muajt në vijim, për të siguruar rihapjen e TikTokut në një kohë sa më të arsyeshme, por sigurisht me të gjitha garancitë e nevojshme, në mungesë të të cilave jemi të detyruar ta mbyllim së shpejti aksesin në platformë,” tha Rama.
Vendimi për ndalimin e aksesimit të TikTok në Shqipëri ende nuk ka hyrë në fuqi, por mund të aplikohet nëse platforma nuk siguron garancitë e nevojshme për funksionimin e saj.
