Përdorimi i monopatinave elektrike, që vitet e fundit ishte kthyer në një mënyrë të shpejtë dhe moderne lëvizjeje sidomos në kryeqytet, do të ndalohet. Vendimi u njoftua nga Ministrja e Brendshme, Albana Koçiu, pas një serë shqetësimesh për rritjen e ndjeshme të aksidenteve, ku shpesh janë përfshirë të mitur dhe të moshuar.
Sipas të dhënave nga Policia e Shtetit dhe Spitali i Traumës, vetëm gjatë vitit 2024 janë regjistruar rreth 1000 aksidente me monopatina. Shumë prej tyre kanë rezultuar me dëmtime të rënda – fraktura, lëndime në kokë apo shtyllë kurrizore.
Një tjetër problem madhor ka qenë përdorimi i monopatinave nga fëmijët dhe të rinjtë, shpesh pa asnjë pajisje mbrojtëse. Ligji nuk përcaktonte kufij moshe apo rregulla të qarta për përdorimin e tyre, çka e ka bërë të pamundur kontrollin efektiv. Rreth 35% e aksidenteve kanë ndodhur për shkak të mungesës së kaskës, ndërsa gjobat aktuale prej 250 deri në 1,000 lekë janë konsideruar simbolike.
Ekspertët e sigurisë rrugore e kanë quajtur këtë ndalim një masë emergjente, të domosdoshme për të frenuar situatën e krijuar. Megjithatë, vendimi ka hapur edhe debat publik: një pjesë e qytetarëve e shohin si kufizim të lirisë së lëvizjes dhe goditje për bizneset që ofronin shërbime me monopatina në qytet.
Autoritetet paralajmërojnë se ndalimi është i përkohshëm, derisa të krijohet një kuadër ligjor i posaçëm për rregullimin e përdorimit të këtyre mjeteve. Deri atëherë, monopatinat do të mbeten të ndaluara në rrugët shqiptare.
