Shqipëria po hyn zyrtarisht në SEPA, një hap që pritet t’i transformojë pagesat ndërkombëtare në euro për qytetarët dhe bizneset. Procesi formal nisi me dorëzimin e aplikimeve nga bankat komerciale pranë Keshillit Evropian të Pagesave gjatë prillit 2025, ndërsa data operacionale për nisjen e transferimeve SEPA është caktuar për 7 tetor 2025.
Përfitimet e pritshme janë rritja e shpejtësisë së transferimeve në euro, përputhshmëri me standardet evropiane dhe ulje relative e kostove krahasuar me kanalet tradicionale ndërkombëtare. Banka e Shqipërisë dhe aktorët e tregut theksojnë se kjo do të lehtësojë tregtinë dhe pagesat e emigrantëve drejt dhe nga vendi.
Cilat do të jenë tarifat e reja për transfertat e parave?
Banka e Shqipërisë ka komunikuar se do të ekzistojë një tavan për sa i përket komisioneve të mbajtura nga bankat për transfertat hyrëse elektronike të çfarëdo vlere, i cili nuk do të jetë më i lartë se 3 euro.
Për transfertat dalëse elektronike me vlerë deri në 100 mijë euro, komisioni nuk mund të jetë më i lartë se 0.01% e vlerës, ndërsa për transfertat mbi 100 mijë euro, tarifa maksimale do të jetë 25 euro. Minimumi i komisionit që mund të aplikohet nuk mund të jetë më i lartë se 2 euro.
Megjithatë, përdoruesit duhet të jenë të vëmendshëm: bankat dhe ofruesit e pagesave mund të aplikojnë struktura të ndryshme tarifore (komision fikse, tarifa për shpejtësi të përpunimit, etj.) brenda kufijve të përcaktuar, dhe disa shërbime premium ose ndërmjetësues mund të kërkojnë tarifa shtesë. Për të përfituar më shumë, klientët duhet të kontrollojnë listat zyrtare të tarifave para se të kryejnë transfertat.
Hyrja në SEPA është një hap i rëndësishëm drejt integrimit financiar evropian, ajo u sjell qytetarëve transfertat më të shpejta dhe më të përballueshme, por edhe kërkon transparencë dhe vëmendje nga përdoruesit ndaj politikave të tarifimit të bankave.
