Ora më e re nga prodhuesi zviceran i orave Vacheron Constantin është zyrtarisht ora mekanike e dorës më e ndërlikuar e prodhuar ndonjëherë.
Në horologji, një “ndërlikim” i referohet çdo funksioni që shkon përtej përcaktimit standard të kohës, siç është një kalendar Gregorian ose shfaqja e fazës së hënës. Dhe Les Cabinotiers Solaria Ultra Grand Complication i Vacheron Constantin përmban një rekord prej 41 funksionesh.
Dizajni, i cili u shfaq në panairin tregtar Watches and Wonders në Zvicër të martën, përfshin 1,521 komponentë të veçantë. Prodhuesi i orës po kërkon të mbrojë krijimin e tij të ri përmes 13 aplikimeve për patentë, 7 prej të cilave kanë të bëjnë me mekanizmin e zhurmës.
Ora paraqet 3 matje të ndryshme të kohës: Një ditë konvencionale 24-orëshe, koha që i nevojitet Tokës për t’u rrotulluar rreth boshtit të saj, e cila është rreth 4 minuta më e shkurtër se një ditë kalendarike dhe ditën solare (e cila është e rregulluar për orbitën eliptike të Tokës).
Ndër dhjetëra ndërlikime të tjera janë funksionet astronomike që gjurmojnë pozicionin, lartësinë, trajektoren dhe këndin e diellit në lidhje me ekuatorin e Tokës. Ora paraqet 13 yjësitë e zodiakut duke treguar gjithashtu informacion se kur ato yjësi do të jenë të dukshme në qiell.
Vacheron Constantin tha se ora e saj që thyente rekord ka nisur të përgatitet 8 vite më parë, duke e përshkruar atë si një “kryevepër inovacioni“. Kutia e orës me një model të vetëm është bërë nga ari i bardhë 18 karatësh dhe përmban mbi 200 gurë të çmuar.
Sfida e dizajnit kishte të bënte gjithashtu me vendosjen e funksioneve të orës në një hapësirë mjaft të vogël për t’u mbajtur rehat në dore, sipas drejtorit të stilit dhe trashëgimisë së Vacheron Constantin, Christian Selmoni.
“Objektivi kryesor ishte të bashkoheshin të gjitha ndërlikimet kryesore, matjen e kohës, kalendarin, kronografin dhe tingëllimin, në një pllakë të vetme bazë dhe të përqendroheshin funksionet astronomike në një fushë shtesë,” citohet të ketë thënë ai. “Falë këtij konstruksioni, u bë e mundur të krijohej një orë dore me të gjithë elementët në harmoni.”
