Studiuesit nga University of Hull dhe Hull York Medical School zbuluan se në mushkëritë e disa personave gjendeshin copëza më të vogla se 5mm plastike, të vendosura në skajet më të thella të mushkërive.
Më parë kjo gjë mendohej të ishte e pamundur, për shkak të ngushtësisë së rrugëve të frymëmarrjes. Ky studim vjen shumë pak kohë pasi u zbulua prania e mikroplastikës në gjakun human për herë të parë, duke theksuar se sa e përhapur është kjo grimcë në trupin tonë.
Ekipi i studiuesve treguan se këto zbulime do të ndihmojnë studimet e mëvonshme rreth impaktit të mikroplastikës në sistemin tonë respirator. Studimi i publikuar në Science of Total Enviroment ka zbuluar 39 mikroplastika në 11 nga 13 indet e testuara të mushkërive, shumë herë më tepër se në testimet laboratorike të mëparshme.
Drejtuesja e këtij studimi, Lara Sadofsky tha: “Më parë praninë e mikroplastikave ne e kishim vënë re gjatë kryerjes së autopsisë në personat e vdekur, por përmes këtij studimi ne arritëm të gjenim praninë e tyre në mushkëritë e personave të gjallë. Këto të dhëna tregojnë për një zhvillim të madh për sa i përket ndotjes së ajrit dhe mikroplastikës në ambientin ku jetojmë.”
Mikroplastikat e zbuluara i përkisnin 12 llojeve të ndryshme, të cilat gjenden të shishe, veshje dhe shumë proçese të ndryshme prodhimi. Gjithashtu u vu re se niveli i mikroplastikës ishte më i lartë tek meshkujt se tek femrat.
