Për disa njerëz, një moment i kaluar pa mbajtur në dorë smartphone-in e tyre, duket tepër i gjatë. Mirëpo me sa duket “fiksimi” ynë me smartphone-t ndikon në sigurinë tonë gjatë drejtimit të makinës.
Studiuesit në Monash University kanë zbuluar se personat që vuajnë nga “nomofobia” e rëndë (një gjendje psikologjike ku njerëzit janë të frikësuar kur nuk kanë një smartphone) kanë 85% më tepër shance të përdorin pajisjen e tyre ndërkohë që drejtojnë makinën. Kjo situatë ishte më e veçantë sidomos për djemtë, tek të cilët kjo gjendje ishte më e përhapur.
Dhe pse është i ndaluar me ligj përdorimi i smartphone-ve ndërkohë që ju drejtoni makinën, madje dhe kur prisni në semafor, shumë njerëz e kanë të vështirë të shkëputen nga pajisja e tyre.
Studiuesit morën në pyetje 2773 pjesëmarrës nga Australia, të cilët plotësuan një pyetësor për të përcaktuar nivelin e tyre të nomofobisë. Një ndër pyetjet ishte dhe: “A e keni përdor smartphone-in tuaj në një mënyrë që ndalohet nga ligji ndërkohë që drejtonit makinën?”
Rezultatet treguan se të gjithë personat që vuanin nga nomofobia e rëndë kishin 85% më tepër shance që të përdornin smartphone-in në mënyrë ilegale ndërkohë që drejtonin makinën. Gjithashtu u zbulua dhe një lidhje midis moshës dhe gjinisë në këtë fenomen.
Pjesëmarrësit mbi 60 vjeç ishin 92% më pak të prirur për të përdorur smartphone-in ndërkohë që drejtonin makinën. Nga ana tjetër burrat kishin 20% më tepër gjasa të përdornin smartphone-in në krahasim me femrat.
F. Kaviani, i cili drejtoi këtë studim thotë: ”Studimi ynë tregon se shkalla e nomofobisë është një parashikues i drejtimit të rrezikshëm të makinës.”
