Një studim i ri, i botuar në Journal of Human Development and Capabilities, tregon se fëmijët – veçanërisht vajzat – që zotërojnë një smartphone para moshës 13 vjeç mund të përballen me pasoja më të këqija në shëndetin mendor kur rriten.
Studimi analizoi të dhënat e mbi 100,000 të rinjve 18–24 vjeç përmes pyetësorëve që matnin simptoma si agresiviteti, shkëputja emocionale, halucinacionet dhe mendimet vetëvrasëse. Rezultatet treguan se çdo vit përdorimi i smartphone para moshës 13 lidhej me probleme të shëndetit mendor.
Të dy gjinitë raportuan vetëvlerësim dhe imazh personal më të ulët. Vajzat shfaqnin më pak rezistencë emocionale dhe më pak besim, ndërsa djemtë ndiheshin më pak të qetë, jot ë qëndrueshëm dhe më pak empatikë. Rreth 48% e vajzave që kishin smartphone që në moshën 5–6 vjeç raportuan mendime vetëvrasëse të rënda, krahasuar me 28% të atyre që e morën në moshën 13 ose më vonë. Tek djemtë, shifrat ishin përkatësisht 31% dhe 20%.
Autorët e studimit theksuan se përdorimi i hershëm i smartphone lidhet ngushtë me ekspozimin ndaj rrjeteve sociale, bullizimit kibernetik, gjumit të dobët dhe marrëdhënieve të dobëta familjare. Ata rekomanduan ndalimin e përdorimit të smartphone-ve dhe rrjeteve sociale para moshës 13, edukim mbi përdorimin e sigurt digjital dhe përgjegjësi më të madhe nga kompanitë teknologjike.
Ekspertët sugjeruan që fëmijët të mos kenë smartphone para moshës 14 dhe prindërit të diskutojnë hapur me ta për rreziqet dhe sjelljen online. Opsione si telefonat me butona mund të ofrojnë komunikim pa ekspozim ndaj rrjeteve sociale. Gjithashtu, autorë si Jonathan Haidt propozojnë rregulla kombëtare: pa smartphone para gjimnazit, pa rrjete sociale para moshës 16 dhe në shkolla pa telefona.
Akademia Amerikane e Pediatrisë këshillon prindërit të ndjekin “5 C-të” e përdorimit të mediave: të përshtatin përmbajtjen me fëmijën, të vlerësojnë cilësinë, të ndihmojnë në menaxhimin e emocioneve, të ruajnë kohën për aktivitete jashtë mediave sociale dhe të komunikojnë rregullisht për përdorimin digjital.
