Për të udhëtuar drejt sistemit më të afërt yjor, Alpha Centauri, njerëzimit do t’i duhej më shumë se një jetë. Për këtë arsye, shkencëtarët kanë imagjinuar për dekada idenë e anijeve kozmike të cilat do të strehojnë breza të tërë njerëzish gjatë një udhëtimi që zgjat me shekuj. Një konkurs i quajtur Project Hyperion sfidoi ekipet shkencore të hartonin koncepte të tilla, dhe fituesi prezantoi projektin Chrysalis, një anije gjigante që teorikisht mund të çonte mijëra njerëz në një udhëtim mbi 400 vjeçar drejt Alpha Centauri.
Dizajni i Chrysalis është relativisht i thjeshtë: një cilindër gjigand, mbi 58 km i gjatë dhe me masë rreth 2.4 miliardë tonë. Shumica e masës përbëhet nga karburanti i lëngshëm për fazat e përshpejtimit dhe ngadalësimit. Në qendër ndodhet moduli i habitatit, i projektuar për të strehuar mbi 1,000 njerëz fillimisht, të cilët do të shumohen me kalimin e kohës. Për të krijuar gravitet artificial, anija do të përdorë guaska të brendshme rrotulluese që shfrytëzojnë forcën centrifugale, duke shmangur problemet shëndetësore që sjell mungesa e gravitetit.
Ndërtimi i saj parashikohet të bëhet në pikën Lagrange 1 mes Tokës dhe Hënës, një vend “parkimi” natyror në hapësirë që kërkon pak karburant për qëndrueshmëri. Procesi do të zgjaste 20-25 vjet, ndërsa para nisjes, ekipi sugjeron që gjenerata e parë të jetojë për 70-80 vjet në Antarktidë për t’u përshtatur me izolimin ekstrem.
Autorët theksojnë se sfida kryesore nuk është teknologjike, por psikologjike: banorët do të braktisin Tokën përgjithmonë. Për këtë arsye, Chrysalis është menduar si një “anije e gjallë”, ku njerëzit, robotët dhe inteligjenca artificiale bashkëjetojnë, ndajnë informacione dhe marrin vendime së bashku.
Ky koncept fitoi konkursin falë zgjidhjeve ndaj rrezatimit kozmik dhe vizionit të tij për një shoqëri të re kozmike, që ndoshta një ditë nuk do ta shohë një planet të ri si destinacion, por vetë anijen si shtëpinë e saj të përhershme.
