Bashkë themeluesi i Rock-A-Fella Records, Jay-Z, ka paditur bashkë themeluesin tjetër Damon Dash pasi mendohet se ai ka tentuar të shesë një NFT të albumit të parë të këngëtarit Reasonable Doubt në 1996.
Në proçesin gjyqësor tregohet se Dash në bashkëpunim me platformën SuperFarm nxorrën në ankand NFT e Reasonable Doubt. Bashkë me dokumentet e tjera vihet re një njoftim për shtyp nga SuperFarm e cila e cilëson shitjen si “një nga ankandet më të rëndësishme të NFT deri më sot, pasi me shitjen do të transferohen dhe të gjitha përfitimet e ardhshme të gjeneruara nga ky album”.
Mirëpo avokatët e Rock-A-Fella thonë se ky nuk ishte produkti i Dash dhe ai nuk mund ta përdorë atë sipas dëshirës. Dash ka vetëm një pjesë të vogël të aksioneve në RAF dhe për këtë arsye ai nuk ka të drejtën të shesë një aset të kompanisë. Pas kërkesës së RAF ankandi u anulua nga SuperFarm, mirëpo grupi pretendon se Dash po tenton të gjejë një zëvëndësues të SuperFarm.
Damon e ka quajtur proçesin gjyqësor të parregullt, pasi sipas pretendimeve të tij ai po mundohet të shesë vetëm pjesën e tij në RAF dhe jo albumin.
Rock-A-Fella kërkon nga Dash të dorëzojë të gjitha NFT e krijuara në lidhje me albumin dhe të paguajë një shumë parash për dëmin e shkaktuar.
