Elon Musk ka treguar se Apple ka ndaluar shumicën e reklamimeve në Twitter dhe akuzon këtë kompani se ka kërcënuar heqjen e aplikacionit nga App Store.
Përplasja vjen pasi shumë kompani të mëdha kanë vendosur të mos shpenzojnë më tepër para për të reklamuar produktet e tyre në Twitter pas ndryshimeve të bëra në platformë nga Musk.
Nga ana tjetër Musk ka treguar se kompanitë kanë vendosur të largohen nga platforma për shkak të presionit nga aktivistët. Ditën e hënë, përmes disa postimesh në Twitter, Elon Musk akuzoi Apple për censurim dhe ka kritikuar politikat e kompanisë, duke përfshirë këtu dhe përqindjen e fitimeve që Apple merr nga shitjet në App Store.
What’s going on here @tim_cook?
— Elon Musk (@elonmusk) November 28, 2022
“Apple pothuajse ka ndaluar reklamimet në Twitter. A e urrejnë ato fjalën e lirë në Amerikë?” tha ai. Elon shtoi gjithashtu se CEO i Apple, Tim Cook, ka kërcënuar se do të largojë Twitter nga App Store, por nuk i ka treguar se cila është arsyeja e këtij veprimi.
Për sa kohë vazhdon të ketë probleme me sektorin e reklamave në Twitter, Musk shpreson se fitimet e kompanisë do të vijnë vetëm nga përdoruesit që abonohen në Twitter Blue për të përfituar verifikimin në platformë.
