Në kuadrin e Bienales së ardhshme Ndërkombëtare të Arkitekturës në Venecia, Ministria e Ekonomisë, Kulturës dhe Inovacionit po bën thirrjen për shpalosjen e ideve të reja në fushën e arkitekturës të frymëzuara nga shoqëria shqiptare, për t’i prezantuar ato më pas në ekspozitat e veta në pavijonet në Giardini dhe Arsenale, si dhe qendrën historike të Venecias.
Ekspozita e 19-të Ndërkombëtare e Arkitekturës në Venecia do të jetë e hapur për publikun në periudhën 10 maj – 23 nëntor 2025, me temë “Intelligens.Natyrale.Artificiale.Kolektive”.
Në një postim në llogarinë zyrtare të Ministrisë së Ekonomisë, Kulturës dhe Inovacionit shkruhet: “MEKI hap thirrjen për projekt-ide të frymëzuara nga një vëzhgim i kujdesshëm i arkitekturës bashkëkohore dhe i shoqërisë shqiptare, 🏗️🏙️ sidomos aty ku kjo bën ndryshimin, si dhe mjetet vizuale përmes të cilave ato do t’i komunikohen publikut të gjerë dhe profesionistëve. 🙌🏻👷🏻♀️”
Të gjithë kandidatët janë të ftuar të bashkëpunojnë me kuratorë vendas ose të huaj të cilat kanë përvojë të mëparshme në evente të ngjashme, për të dorëzuar një projekt që na përfaqëson denjësisht në këtë event të rëndësishëm. Afati i dorëzimit të projekteve është deri në datën 8 tetor 2024, të cilat mund të dërgohen në adresën e email-it biennale2025@meki.gov.al.
