Në vitin 2021 Richard Branson hyri në histori pasi u bë miliarderi i parë që arriti në hapësirë. Dhe tani ai po përgatitet të rikthehet në kufijtë e hapësirës.
Bashkëthemeluesi i Virgin është konfirmuar si bashkë-pilot në fluturimin e parë komercial në botë me balonë në stratosferë. Gjatë fluturimit, Branson do të qëndrojë në një lartësi prej 32 km në qiell në bordin e një kapsule me presion, të tërhequr nga një balonë. Përveç pasurisë, Branson njihet dhe për aventurat e tij, pasi ka thyer dy rekorde botërore duke udhëtuar me balona duke kaluar oqeanet Atlantik dhe Paqësor në 1987 dhe 1991 respektivisht.
“Disa nga përvojat më madhështore të jetës sime kanë ndodhur në ekspedita me balona dhe jam i emocionuar të mbështes Space Perspective në udhëtimin e saj”, tha ai. “Unë jam i apasionuar pas aventurës dhe të ndihmoj sipërmarrësit e tjerë të arrijnë ëndrrat e tyre të biznesit.”
Branson do të jetë një nga tre pilotët në udhëtimin e parë të Space Perspective në 2025, duke u bashkuar me bashkëthemeluesit e kompanisë Jane Poynter dhe Taber MacCallum. Gjatë nisjes, balona masive hapësinore do të mbushet me hidrogjen, duke e ngritur kapsulën e Spaceship Neptune në qiell me një shpejtësi të butë prej rreth 19 km në orë.
Kur fryhet plotësisht, balona është gati po aq e gjatë sa Kulla Eifel dhe mund të mbushë një stadium të tërë futbolli. Sapo kapsula të arrijë një lartësi prej rreth 32 km, ajo do të qëndrojë në nivele mbi atmosferën që nuk janë arritur kurrë më parë në një fluturim komercial me balonë.
Një fluturim provë i suksesshëm pa ekuipazh, duke ndjekur të njëjtën trajektore fluturimi dhe lartësi si udhëtimet e ardhshme, u zhvillua në shtator. Zonja Poynter tha: “Përpjekjet pioniere të Richard në industrinë e balonave ishin një frymëzim kryesor për ne kur themeluam Space Perspective. Tani jemi në një mision për t’u dhënë eksploruesve pamje befasuese të Tokës kundër një qielli të zi dhe ta bëjmë këtë me qetësi në një mënyrë që ta mundësojnë vetëm balonat.”
