Sipas raportimeve gjatë fundjavës të Cyber News të dhënat personale të 1.3 milionë përdoruesve të Clubhouse janë publikuar në një forum hakerash. Njësoj si informacionet personale të grumbulluara më parë në Facebook dhe LinkedIn, ato përmbajnë të dhëna rreth emrit, datëlindjes, adresave të rrjeteve sociale të lidhura me të dhe emrin e përdoruesit që ka ftuar përdoruesin në platformë.
Clubhouse nuk iu përgjigj menjëherë pyetjeve të gazetarëve, por më vonë në Twitter adresa zyrtare shkruajti se nuk bëhej fjalë për një penetrim në sistem nga hakerat, por një grumbullim i të dhënave që janë publike përmes API së aplikacionit.
Teknikisht kjo mund të jetë e vërtetë, mirëpo përdoruesit ndihen disi të shqetësuar nga ky fenomen, pasi kjo është hera e 3-të brenda një kohe shumë të shkurtër që të dhënat nga rrjete sociale të ndryshme publikohen online. Emrat e vërtetë të përdoruesve mund të përdoren nga hakerat për të krijuar skema phishing jo domosdoshmërisht në Clubhouse.
Duket sikur do të jetë vetëm një çështje kohe deri sa ky fenomen të prekë dhe rrjete sociale të tjera, për sa kohë që platforma gjigande si Facebook, LinkedIn dhe Clubhouse po dëmtohen nga këto sulme.
