Elita e biznesit të Italisë është tronditur nga një mashtrim i ri që përdori zërin e Ministrit të Mbrojtjes, Guido Crosetto, të gjeneruar nga inteligjenca artificiale.
Mashtruesit përdorën këtë teknikë për t’u kërkuar manjatëve të transferonin miliona në llogaritë bankare jashtë shtetit për të ndihmuar në pagesën e shpërblimeve që do të bënin të mundur lirimin e gazetarëve italianë të rrëmbyer në Lindjen e Mesme. Mashtrimi shënjestroi disa nga biznesmenët më të fuqishëm të Italisë, duke përfshirë drejtuesin e Pirelli-t Marco Tronchetti Provera, stilistin Giorgio Armani, drejtuesin e Prada-s Patrizio Bertelli, pronarin e Tod-it Diego Della Valle, ish-pronarin e Interit Massimo Moratti dhe anëtarët e familjeve miliarder Beretta dhe Menarini, tha një person me njohuri për hetimin.
Ndërsa shumë prej miliarderëve patë ndyshime, njëri prej tyre u bind se situata ishte e vërtetë dhe transferoi 1 milion euro në llogaritë bankare jashtë shtetit, pasi “u sigurua” se do të rimbursohej nga Banka e Italisë më vonë për pagesën. Deri më tani, tre biznesmenë milanez kanë paraqitur ankesa zyrtare në zyrën e prokurorit të qytetit, duke përfshirë një që ra viktimë e mashtrimit. Autoritetet e njohura me rastin thonë se mashtrimi përfshinte raunde të shumta telefonatash nga njerëz që paraqiteshin si stafi i Crosetto-s dhe përdorimin e dukshëm të AI për të simuluar bindshëm zërin e Crosetto-s.
Objektivave iu tha se qeveria e kryeministres Giorgia Meloni kishte nevojë për ndihmën e tyre për të shpëtuar gazetarët italianë të rrëmbyer në Lindjen e Mesme. Hetuesit thanë se telefonatat dukej se vinin nga numrat e telefonit që i përkisnin stafit të ministrit të mbrojtjes – të cilët ata besonin se ishin klonuar. Mashtruesit kryen këtë skemë vetëm disa javë pasi qeveria e Melonit negocioi një shkëmbim pengjesh të profilit të lartë, në të cilin një gazetare e re italiane, Cecilia Sala, u lirua nga burgu famëkeq Evin i Teheranit, në këmbim të Romës që kthente një inxhinier iranian të kërkuar në SHBA për një skemë që ofronte teknologji të sofistikuar të dronëve amerikanë për Gardën Revolucionare të Iranit.
Crosetto së pari dha alarmin e “një mashtrimi serioz të vazhdueshëm” në një postim në mediat sociale javën e kaluar, duke thënë se donte të rriste ndërgjegjësimin e publikut në mënyrë që “askush të mos rrezikojë të bjerë në kurth“.
