Një ligj i ri që hyri në fuqi gjatë kësaj jave në Kaliforni detyron shumicën e kompanive në këtë shtet të përcaktojnë rrogat përkatëse sa herë që kërkojnë për një vend pune. Ky ligj prek të gjitha kompanitë me më tepër se 15 punonjës që kërkojnë për punonjës të rinj.
Kjo gjë tregon se ne tashmë dimë se cilat janë pagat që kompanitë më të mira në botë iu japin punonjësve të tyre.
Një program manager në grupin e AR të Apple do të përfitojë një rrogë bazë midis $121,000 dhe $230,000 në vit, bazuar në një publikim të kompanisë ditën e mërkurë. Një inxhinier software-i në mesin e karrierës së tij në Google Health mund të presë të përfitojë midis $126,000 dhe $190,000 në vit, ndërkohë që një drejtues në ekipin e inxhinierisë së software-it në Meta, i cili drejton ekipet në ndërtimin e infrastrukturave të rrjeteve, mund të përfitojë midis $253,000 dhe $327,000 në vit.
Duhet të theksojmë gjithashtu se në këto lista nuk përmenden bonuset të cilat kompanitë japin për tërheqjen dhe mbajtjen e punonjësve në kompani.
Kalifornia është shteti më i ri në SHBA që ka futur në fuqi ligjet e reja për transparencën e pagesave. Qëllimi kryesor i këtij ligji është të ulë fenomenin e nënpagesës në bazë të gjinisë apo racës.
Aktualisht femrat paguhen 83 cent për çdo dollar që një mashkull fiton, sipas U.S Census.
