Dhjetëra mijëra nomadë dixhitalë kanë vendosur që të shpërngulen për në Portugali për të jetuar, mirëpo ky vendim duket se ka bërë që kostoja e jetesës në këtë vend të rritet, dhe qytetarët portugezë nuk janë shumë të lumtur.
“Vendasit janë shumë të inatosur.” tha Guya Accornero, një sociolog në University Institute of Lisbon. “Ata nuk janë aspak të lumtur.”
Zemërimi i qytetarëve po rritet akoma më tepër nga valët e mëdha të vizitorëve që përplasen në Portugali, duke përkeqësuar problemet ekzistuese në këtë vend. Por një trend i ri mund t’i përkeqësojë gjërat akoma dhe më tepër: puna nga distanca. Rreth 16,000 nomadë dixhitalë jetojnë tashmë vetëm në kryeqytetin portugez Lisbonë, sipas Nomad List. Megjithatë, numri i tyre mund të rritet edhe më tej. Në tetor, një skemë e re e vizave për nomadët dixhitalë hyri në fuqi në Portugali, megjithëse deri më tani vetëm rreth 200 – kryesisht britanikë dhe amerikanë – kanë përfituar nga kjo skemë.
“Profesionistët e rinj të huaj tërhiqen nga Lisbona sepse qyteti është shumë i lezetshëm dhe ka stil,” thotë Accornero.
Nomadët dixhitalë gëzojnë paga dukshëm më të larta se vendasit – atyre u kërkohet të fitojnë të paktën €2,800 në muaj për të marrë vizën speciale. Kjo rrogë është pak më e lartë se e gjysmës së të gjithë punëtorëve që fitojnë më pak se €1000, siç tregon Ministri i Punës të Portugalisë.
Ky “muskul ekonomik ngre çmimet“, thotë Catarina Viegas nga Climáximo.
Ajo pretendon se vlerat e qirasë dhe pronës janë veçanërisht të prekura, pasi nomadët dixhitalë “gëlltisin” qiratë afatshkurtra që janë të gjitha tashmë nën presion të jashtëzakonshëm nga turistët dhe investitorët e huaj. Çmimet e shtëpive në Portugali janë dyfishuar që nga viti 2015, sipas Fondit Monetar Ndërkombëtar. Shumë vëzhgues thonë se vendi po përballet me një krizë strehimi, me çmime që tejkalojnë shumë të ardhurat.
“Një nga ndikimet më të mëdha janë fluturimet,” shtoi Viegas. “Aeroplanët lëshojnë një sasi të madhe emetimesh“. Shumica e vizave nomade dixhitale u janë ofruar shtetasve amerikanë dhe brazilianë, duke bërë që fluturimet të jenë të gjata në drejtim të vendeve të tyre. Megjithatë, nomadët dixhitalë janë vetëm “maja e ajsbergut“, pohon studiuesi Accornero. “Tendencat shumë, shumë të fuqishme globale po pushtojnë Portugalinë.”
