Tashmë janë shfaqur në internet pamjet e para të kabinave ku shumë fansa do t’i bashkohen Katarit për Kupën e Botës 2022, dhe për fat të keq ato duken si kontenierë të vendosur në rreshta.
Katari nuk është një shtet i madh, dhe ndoshta mund të kuptohet arsyeja se përse Sepp Blatter pranoi se organizimi i Kupës së Botës në këtë shtet ishte një “gabim”. Katari ka nisur gjithashtu grumbullimin e anijeve turistike që do të funksionojnë si një hotel për njerëzit, pasi nuk ka shumë hapësira në hotele për t’u akomoduar i gjithë fluksi i fansave.
Hapësira e quajtur “Fan Village Cabinas Free Zone”, pavarësisht kushteve jo shumë të mira do t’i kushtojë fansave rreth £200 në natë. Për këtë çmim ju përfitoni dhe dy shishe ujë në ditë, një sasi shumë e vogël kjo duke menduar se do të jetoni në shkretëtirë.
E vetmja gjë e mirë e këtyre kabinave është se janë të lokalizuara në një distancë të afërt me metronë, për të lëvizur në drejtim të stadiumeve të ndryshme. Nëse ju nuk dëshironi të kaloni kohën të mbyllur në kutinë tuaj metalike, mund të uleni jashtë dhe të shikoni ndeshjet e tjera të Kupës së Botës në ekran të madh.
