Këshilli i BE-së ka miratuar një pozicion të ri për të përditësuar rregullat mbi të drejtat e pasagjerëve ajrorë dhe përgjegjësinë e linjave ajrore, me synim thjeshtimin dhe qartësimin e tyre, duke balancuar mbrojtjen e pasagjerëve me konkurrencën e industrisë. Kuadri i ri sjell mbi 30 të drejta të reja, që mbulojnë gjithë përvojën e udhëtimit nga blerja e biletës deri në mbërritje.
E drejta për ofrimin e fluturimeve alternative
Ndër përmirësimet kryesore është detyrimi i ofrimit të fluturimeve alternative: linjat ajrore duhet të ofrojnë fluturime alternative menjëherë, dhe nëse nuk e bëjnë brenda 3 orëve, pasagjerët mund të organizojnë vetë një fluturim alternativ dhe të kërkojnë rimbursim deri në 400% të çmimit të biletës.
E drejta për asistencë është forcuar, duke përfshirë ushqim, akomodim dhe kujdes gjatë ndërprerjeve ose vonesave në pistë.
E drejta për kompensim në rast anulimi apo vonesash
Rregullat për kompensimin janë përditësuar: 300 € për fluturime brenda BE-së ose nën 3,500 km me vonesa 4+ orë, dhe 500 € për fluturime më të gjata me vonesa 6+ orë. Linjat ajrore nuk mund të përdorin më “rrethana të jashtëzakonshme” si justifikim, pa dëshmuar se kanë marrë masa të arsyeshme.
Anulimet njoftuar më pak se 14 ditë para nisjes japin të drejtë për kompensim, dhe linjat duhet të ofrojnë formularë të plotësuar paraprakisht. Këshilli synon gjithashtu të dekurajojë politikën e “no-shoë“; pasagjerët që humbasin fluturimin e parë nuk mund të ndalohen në fluturimin e kthimit.
E drejta për informim
Kërkohen gjithashtu detyrime më të rrepta për informimin: linjat ajrore duhet të informojnë qartë pasagjerët për të drejtat e tyre dhe të përgjigjen brenda 14 ditësh ndaj ankesave. Pasagjerët kanë 6 muaj për të paraqitur kërkesat.
Hapat e ardhshëm
Parlamenti Evropian do të shqyrtojë dhe mund të ndryshojë ose miratojë këtë pozicion. Këto reforma vijnë pas një përpjekjeje 10-vjeçare për përditësimin e rregulloreve të propozuara që në 2013-ën, duke synuar mbrojtje më të forta e më të qarta për pasagjerët ajrorë në BE.
