Njeriu më i pasur në botë, ai që e nisi me një dyqan online për libra e sot udhëheq një kompani gati $1.7 trilion ka vendosur që të mos jetë më CEO i saj.
Jeff Bezos ka deklaruar se nuk do të jetë më shefi ekzekutiv i Amazon.
Ai e themeloi kompaninë në 1994 me shërbimin e thjeshtë të shitjes së librave, nën lidershipin e tij kompania është sot kampioni i tregtisë online, strukturë mbështetëse prapa shërbimeve të rrjetit modern nëpërmjet Amazon Web Services. Ka krijuar një perandori abonentësh rreth Amazon Prime ka sjellë produkte të njohura teknologjike si Echo dhe Kindle dhe madje hyri edhe në radhët e zinxhireve të supermarketeve me Whole Foods.
Arsyeja e largimit të tij ka të bëjë me përqëndrimin e energjive tek struktura të tjera të tijat si Day 1 Fund, Bezos Earth Fund, Blue Origin, The Washington Post dhe pasione të tjera.
Bezos nuk do të largohet plotësisht nga Amazon, ai do të jetë kryetar i bordit drejtues të kompanisë, çka do t’i lejojë të mos jetë i angazhuar çdo ditë por do të ruajë një pozicion mbikqyrës.
Vendin e tij do ta marrë Andy Jassy, aktualisht CEO i Amazon Web Services.
