Sot Bill Gates është ndër njerzit më të pasur e më me influencë në botë, por ndërsa nuk ka qenë i tillë gjithmonë, vizioni i tij ka qenë më se i qartë që në fillim.
Gates një pioner i revolucionit të kompiuterit personal, ka qenë pjesë integrale e realitetit të sotëm ku secili ka të paktën një laptop në shtëpi.
Ndaj edhe nuk çuditemi kur lexojmë pikpamjet e tij mbi Internetin në një kohë kur popullariteti i tij ende nuk mendohej si një infrastrukturë esenciale.
Në një memo për punonjësit e tij, nën titullin “The Internet Tidal Wave” (Vala e Baticës së Internetit) zbulojmë vizionin e gjeniut Gates në 1995.
“Interneti është një dallgë. Ai ndryshon rregullat. Është një mundësi e pabesueshme e po aq një sfidë e pabesueshme.” Qëndrimi i memos flet për internetin si një fuqi e kudogjendur e cila po ndryshonte mënyrën si njerzit dhe bizneset komunikojnë me njëri tjetrin.
“Dua të bëj të qartë se fokusi jonë për Internetin është thelbësor për secilën pjesë të biznesit tonë.” Bën të ditur qëllimin e tij CEO i Microsoft.
“Mbi të gjitha Interneti e ka përcaktuar veten si një vend për të publikuar kontent. Ka mjaft përdorues të cilët përfitojnë nga reagimi pozitiv. Sa më shumë kontent merr aq më shumë përdores përfiton.” Teksa kupton si mund të shfrytëzohet kjo infrastrukture Gates kapi mundësinë dhe e përdori për të krijuar një urë komunikimi mes publikut dhe shërbimeve të Microsoft.
Ashtu siç pandemia na e vërtetoi, komunikimi audio dhe video në shpejtësi rekord do të bëhej pjesë e pandashme e jetës, dhe e të bërit biznes. Të gjitha këto parashikohen nga Gates i cili ndër të tjera flet për nevojën e madhe që ka rrjeti për përmirësim cilësie dhe infrastrukture. Pasi edhe pse në teori funksionale, në 1995 ky lloj komunikimi ishte një sfidë më vete të paktën për përdoruesin e thjeshtë.
Ai shpjegon potencialin dhe rëndësinë e veçantë të një Homepage si një mënyrë për të monetizuar pozicionin e një njësie në rrjet.
“Besoj se interneti do të shndërrohet në strumentin më të rëndësishëm promovues dhe të paguash njerëz që të përfshijnë linqe tek faqja jonë kryesore do të jetë një mënyrë e mirë për të shpenzuar para reklamash.”
Dhe së fundmi kontakti në kohë reale pa pasur nevojën e ndërmjetësve shihet si një nga benefitet më të mëdha “Kemi një mundësi të bëjmë më shumë me burimet tona. Informacioni do të shpërndahet me efektivitet mes nesh dhe klientëve tanë me shumë më pak mundësi që shtypi të keqinterpretojë planet tona. Klientët do të vijnë tek faqja jonë dhe do të gjejnë çfarëdo që ne duam të dinë.”
Edhe pse me ide të qarta padyshim që rruga për të bindur vartësit e tij dhe publikun e gjerë nuk ka qenë e lehtë, por koha dhe shifrat treguan se vërtetë ky pioner i botës moderne siç e njohim sot paska patur të drejtë.
