Na është udhëzuar të rrimë në shtëpi, jo të gjithë munden sepse janë në punë, ama ka nga ata fatlumë që punën mund ta bëjnë nga shtëpia.
Dhe sado fantastike të duket, të rrish në pizhame, të shtrihesh ku të duash e të parazitosh, mund ta bësh vetëm 2-3 ditë sepse do të kesh detyra për të permbushur në këto kushte në ditët në vazhdim.

Ndaj ja disa këshilla për punë nga shtëpia sa më produktive:

- Krijo një vend pune
Nuk ka pse të jetë një dhomë më vete, duke qënë se në vendbanimet e sotme hapsira është e limituar, mjafton të jetë një vend i cili mendërisht të kujton punën dhe detyrën.

- Cakto një orar
Liria kur askush nuk të rri tek koka të bën të sillesh rrotull dhe të mendosh se ke kohë sa të duash, derisa e gjen veten pasdite vonë me një shishe verë dhe 30 dokumente të tjera për të përfunduar. Caktoji vetes orare, mundohu të fillosh në të njëjtën orë që filloje kur shkoje tek vendi i punës.

- Vishu mirë
Sigurisht që nuk ka si rehatia e pizhamave dhe shapkave, por truri duhet të kuptojë se kur është në relaks dhe kur është në punë e sipër, veshja dhe stimulimi i jashtëm mund të japin rezultat për angazhim maksimal.

- Kujdesu për trupin
Nëse në zyrë duhet të rrije në ndonjë karrige të parehatshme, në shtëpi mund të ngjeshesh në divanin e preferuar, por kujdes, mungesa e aktivitetit është po aq e keqe sa pozicionet e parehatshme. Sigurohu të levizësh herë pas here, bëj disa pushime, ndonjë ushtrim fizik pse jo.

- Ruhu nga fëmijët
Nuk ka rëndësi sa vjeç je, kur një femijë të zgjat një filxhan lodër dhe të thotë të pish, ti do pish!
Shtëpia është vend që mund të bëhet kollaj i zhurmshëm, ama duhet tua bësh të qartë të gjithëve qe je sidoqoftë duke punuar, fëmijëve sidomos. Ndaj për produktivitet maksimal, mbaj larg shpërqëndrimet.

- Merr gjithçka të duhet
Nga printeri tek karrigia laptopi apo çdo objekt që të duhet për të bërë detyrën, sigurohu të mos të të mungojë, mund ti marrësh hua ose edhe vetë kompania mund të ti mbulojë.

Duke ndjekur këto hapa do kesh nivel produktiviteti ndjeshëm më të lartë, ku i dihet ndoshta nuk kthehesh më kurrë në zyrë.