CEO aktual i Twitter, Elon Musk tregoi gjatë një interviste në ditën e mërkurë se koha e përshtatshme për t’u njohur me CEO-n e ri të kësaj platforme do të jetë gjatë fundit të vitit 2023.
“Mendoj se kam nevojë të stabilizoj organizatën dhe të sigurohem që nuk do të ketë probleme nga ana financiare si dhe në mënyrën e organizimit të platformës.” tha Musk ndërkohë që po diskutonte virtualisht në World Government Summit në Dubai, pasi u pyet nga pjesëmarrësit nëse kishte arritur të gjente zëvëndësuesin e tij në Twitter.
“Ende nuk e di, por mendoj se deri në fund të vitit do të jetë e përshtatshme për të gjetur një person tjetër që do të drejtojë kompaninë, pasi unë parashikoj që Twitter do të jetë stabilizuar deri në fund të këtij viti.”
Në datën 21 dhjetor të vitit të kaluar, Musk tha se do të jepte dorëheqjen nga pozicioni i CEO-s së Twitter sapo të gjente një person “mjaftueshëm teveqel” që do të pranojë këtë pozicion. Ai shtoi se do të kontrollojë vetëm “ekipin e serverave dhe software-in”.
Ky vendim erdhi pas organizimit të një sondazhi në Twitter, ku shumica e votuesve treguan dëshirën për të patur një tjetër CEO në platformë.
