Një asteroid që mund të rrafshojë një qytet të mesëm mund të përplaset me Tokën 8 vite më vonë, pasi rrotullimi i tij rreth diellit është në të njëjtën trajektore me atë të planetit tonë.
I quajtur 2024 YR4, shkëmbi hapësinor mbart me vete shanse shumë të vogla për të goditur Tokën dhe astronomët deri më tani kanë përllogaritur probabilitetin e një përplasjeje në rreth 2.3%. Organizatat ndërkombëtare hapësinore si NASA po e marrin seriozisht kërcënimin e mundshëm, sado i vogël të jetë ai.
Richard Moissl, kreu i zyrës së mbrojtjes planetare të Agjencisë Evropiane të Hapësirës, tha se vëmendja e tyre nuk duhet të ngrejë në mënyrë të padrejtë shqetësimin e publikut. Ky asteroid na kalon çdo 4 vjet. Sa herë që rrotullohemi 4 herë rreth diellit, ai ka përfunduar pothuajse me saktësi një rrotullim.
Në dhjetor të vitit 2024 asteroidi kaloi pranë Tokës, gjë që do të thotë se do të jetë në një pozicion afër Tokës në dhjetor 2028, dhe ne e dimë tashmë se ky nuk është problem. Më i rëndësishëm është pozicioni që do të ketë asteroidi në vitin 2032, më 22 dhjetor, diku rreth mesit të ditës në Kohën Universale.
Kjo është kur asteroidi kalon përmes një pjese të orbitës së Tokës. Dhe pyetja është, nëse Toka do të jetë atje në këtë pikë në kohë, apo nëse ajo tashmë do të ketë kaluar apo po i afrohet ende asaj pike.
Ekziston një rajon pasigurie që përfshin, për momentin, të gjithë sistemin Tokë-Hënë. Ka një dritare 20-minutëshe në të cilën Toka mund të jetë në trajektoren e asteroidit përpara se të dalë nga ky pozicion.
Wired raporton se sipas rrugës aktuale të asteroidit, nëse do të godiste Tokën, ekspertët mendojnë se 2024 YR4 duhet të bjerë diku në një brez territori që shtrihet në pjesën veriore të Amerikës së Jugut, përtej Oqeanit Paqësor, në Azinë Jugore, Detin Arabik dhe Afrikën. Pra, vende të tilla si India, Pakistani, Bangladeshi, Etiopia, Sudani, Nigeria, Venezuela, Kolumbia dhe Ekuadori do të ishin në rrezik.
