Më 7 shtator, qielli do të ofrojë një spektakël të rrallë: eklipsi total i Hënës, i njohur ndryshe si “Hëna e Kuqe”. Ky fenomen do të ndodhë gjatë mbrëmjes dhe i gjithë procesi pritet të zgjasë plot 3 orë e 30 minuta. Fillimisht, Hëna do të hyjë gradualisht në hijen e Tokës duke marrë ngjyrë të errët, e më pas, kur të mbulohet plotësisht, do të shndërrohet në një disk të kuqërremtë të ndezur. Ky transformim ndodh për shkak të filtrimit të dritës së Diellit nga atmosfera e Tokës, e cila lë vetëm nuancat e kuqe të depërtojnë.
Një element i veçantë i këtij eklipsi është se pritet të shihet nga rreth 7 miliardë njerëz në mbarë globin, duke e kthyer atë në një nga ngjarjet astronomike më të dukshme të kohëve moderne. Pjesërisht ose tërësisht, eklipsi do të jetë i dukshëm në pjesën më të madhe të Azisë, Afrikës, Australisë dhe Evropës. Shqipëria është ndër vendet ku fenomeni do të shihet qartë: momenti më spektakolar i “Hënës së Kuqe” pritet të ndodhë më 7 shtator, rreth orës 20:10, kur Hëna do të jetë plotësisht e mbuluar nga hija e Tokës (shiko orën ekzakte për vendndodhjen tënde në këtë link).
Ky eklips është i veçantë edhe për faktin se 60% e popullsisë së botës do të mund ta ndjekë të plotë, ndërsa deri në 87% do të kenë mundësi ta shohin të paktën pjesërisht. Përkundrazi, kontinenti amerikan këtë herë mbetet jashtë shfaqjes qiellore, ndonëse pati “privilegjin” e eklipsit të parë të vitit, në mars.
Astronomët kujtojnë se eklipset ndodhin kur Dielli, Toka dhe Hëna vendosen në një vijë të drejtë, një rreshtim i rrallë që ndodh vetëm disa herë në vit. Kjo e bën çdo eklips një ngjarje të veçantë për adhuruesit e qiellit. Ndërkohë, ngjarja më e gjatë e këtij shekulli do të ndodhë më 2 gusht 2027 dhe do të zgjasë mbi 6 minuta.
Pra, mbrëmjen e 7 shtatorit, drejtimi i syve nga qielli në orën 20:10 do të ofrojë një nga shfaqjet më të bukura natyrore.
