Pranvera ka shënuar nisjen e kthimit në zyra për shumë punonjës të kompanive të ndryshme. Kompanitë si Apple dhe Google kanë nisur rikthimin e punonjësve në zyra përmes një orari hibrid që në fillim të këtij muaji.
Mirëpo sondazhet e reja tregojnë se kjo kërkesë kaq e forcuar nga kompanitë mund të bëjnë që punonjësit të shikojnë për alternative të reja në treg. ADP Research Institute publikoi rezultatet e sondazhit të saj ku tregohej se punonjësit më të rinj në moshë ishin të gatshëm të largoheshin nga puna nëse iu kërkohej të riktheheshin në zyra.
Në raportin “People at Work 2022: A Global Workforce View” morrën pjesë më tepër se 32,000 punonjës nga SHBA, India, Hollanda dhe disa shtete të tjera. 65% e forcës punëtore thanë se ato janë larguar ose do të konsideronin të largoheshin nga vendi i punës nëse do t’i kërkohej rikthimi në zyra në kohë të plotë. Në moshat 18 -24 vjeç kjo përqindje shkon në 71%.
“Tashmë është e qartë se punimi në orar hibrid dhe dëshira për fleksibilitet pas dy vitesh punimi nga shtëpia nuk do të largohet, dhe në fakt po rritet dita-ditës.” tha bashkëautorja Nela Richardson. “Njerëzit janë mësuar me një autonominë që punimi nga shtëpia ofron, si përshembull marrja e fëmijëve nga shkolla apo kryerja e vizitave mjekësore pa patur nevojë për të kërkuar leje.”
