Një nga rivalët më të mëdhenj të Tesla-s në Kinë, Xiaomi, sapo prezantoi një SUV elektrik të ri — YU7 — që pritet të konkurrojë drejtpërdrejt me Model Y. Në një event në Pekin, Xiaomi e përshkroi YU7 si një “SUV luksoz me performancë të lartë”, i pajisur me teknologji të avancuar dhe një ekran panoramik “hypervision” nën xhamin e përparmë.
YU7 arrin shpejtësinë maksimale prej 253 km/h dhe përshpejton nga 0 në 100 km/h për 3.23 sekonda. Autonomia maksimale e udhëtimit është 835 km, ndërsa në 15 minuta karikimi mund të shtojë 620 km autonomi. Çmimi ende nuk është zbuluar, por CEO i Xiaomi, Lei Jun, tha se do të dalë në shitje në korrik.
Kjo lëvizje shton presionin ndaj Tesla-s, e cila po përballet me rënie shitjesh në Kinë për shkak të konkurrencës nga prodhuesit vendas. Analistët e Morgan Stanley vlerësuan se YU7, pas suksesit të modelit SU7 që mori 120,000 porosi brenda 36 orëve, do të ishte një sfidë e re për Tesla-n. Sipas tyre, dizajni i YU7 kombinon pamjen e Ferrari-t me çmimin e një Volkswagen-i.
Xiaomi planifikon të hyjë në tregjet ndërkombëtare të automjeteve elektrike deri në vitin 2027, gjë që mund të ndikojë negativisht në shitjet globale të Tesla-s. Megjithatë, nuk ka qenë gjithçka e lehtë për Xiaomi: shitjet ranë muajin e fundit dhe pati kritika për marketing të gabuar dhe një aksident fatal me SU7, i cili shkaktoi ndërhyrje rregullatore mbi funksionet e drejtimit autonom në Kinë.
Kjo tregon se firmat teknologjike kineze po çojnë përpara performancën dhe koston e EV-ve, duke krijuar sfida të mëdha për markat perëndimore si Tesla.
Article by Xhonald Mamo
