Me gjeneratën e re të makinave tërësisht elektrike, Volvo Cars ka si qëllim t’i ofrojë konsumatorëve një autonomi më të gjatë, karikim më të shpejtë, kosto më të ulëta dhe të arrijë një nivel të ri të qëndrueshmërisë dhe sigurisë në industri.
Për të arritur këto qëllime, Volvo Cars do të investojë €1 miliardë në fabrikën në Torslanda, Suedi gjatë viteve në vijim për të prodhuar gjeneratën e re të makinave tërësisht elektrike.
Si pjesë e investimeve të planifikuara, kompania do të prezantojë teknologji dhe proçese të reja prodhimi, ku përfshihet prodhimi i pjesëve prej alumini të makinës, montimi i baterive dhe seksioni i ri i lyerjes së makinave.
Ky investim vjen pas deklaratës nga Volvo Cars dhe Northvolt, kompania lider në prodhimin e qelizave të baterive, ku tregohet se do të investohen €2.8 miliardë në zhvillimin dhe prodhimin e baterive me kualitet të lartë për gjeneratën e re tërësisht elektrike të makinave Volvo.
“Përmes këtyre investimeve ne ndërmarrim një hap të rëndësishëm drejt të ardhmes tonë tërësisht elektrike dhe përgatitemi për të krijuar Volvo elektrike më të avancuara dhe më të mira.” tha drejtuesi ekzekutiv Hakan Samuelsson. “Torslanda është fabrika jonë më e madhe dhe do të luajë një rol tepër të rëndësishëm në transformimin e vazhdueshëm ndërkohë që ne zhvendosemi drejt një të ardhmje tërësisht elektrike duke filluar nga viti 2030.”
Prezantimi i proçesit “mega casting” për pjesët prej alumini të trupit të makinës është një ndër ndryshimet më të rëndësishme të implementuara si pjesë e paketës së investimit. Prodhimi i pjesës më të madhe të strukturës së dyshemesë së makinës si një pjesë e vetme e alumini redukton peshën e makinës, përmirëson efiçiencën e energjisë dhe autonominë e makinës. Ky ndryshim lejon dizenjuesit në Volvo që të shfrytëzojnë maksimalisht hapësirën brenda makinës.
Një tjetër përfitim që vjen nga përdorimi i kësaj teknike është reduktimi i vështirësisë së prodhimit të kësaj makine, duke ulur kështu koston e prodhimit.
Rifreskimi i seksionit të lyerjes së makinave përfshin instalimin e makinerive dhe implementimin e proçeseve të reja që do të bëjnë të mundur reduktimin e konsumit të energjisë dhe emëtimin e gazeve.
Fabrika e re e montimit të baterive do të integrojë qelizat e baterisë dhe modulet në strukturën e dyshemesë së makinës për gjeneratën e ardhshme të makinave tërësisht elektrike.
Fabrika në Torslanda ka një kapacitet prodhimi vjetor prej 300,000 makinash dhe është një ndër pikat më të rëndësishme të prodhimit për Volvo, ku janë punësuar rreth 6,500 persona. Ajo u hap për herë të parë në prill të 1964 nga mbreti suedez Gustaf VI Adolf.
