Bloomberg raportoi ditën e hënë se punonjësit e Tesla në fabrikën e Shanghai do të duhet të flenë në dyshemenë e fabrikës pasi Tesla rinis prodhimin pas 3 javësh mbyllje.
Në publikim citohet se fabrika do të operojë si një “sistem i mbyllur” për të shmangur mbylljet e mëtejshme, për sa kohë Kina praktikon politikat me 0 tolerime mbi infektimet me COVID-19. Punonjësit morën vesh lajmin përmes një memoje nga kompania, ku tregohej se ato do të pajisen me një dyshek dhe një çantë gjumi të cilat do të vendosen në një pjesë të veçantë të fabrikës.
Tesla tregoi gjithashtu se do të ofrojë hapësira për dushe, ushqim dhe argëtim, mirëpo për momentin gjithçka është duke u përgatitur. Punonjësit pritet të marrin një kupon me vlerë rreth $63 në ditë për ushqime, por kjo sasi mund të ndryshojë në varësi të statusit të punonjësit në kompani.
Punonjësit pritet të punojnë 12 orë në ditë, me një ditë pushim çdo 6 ditë. Më parë punonjësit punonin në turn 8 orësh dhe kishin dy ditë pushim.
Tesla nuk është e vetmja kompani që po implementon një sistem të tillë të mbyllur. Më herët gjatë këtij muaji, The Wall Street Journal raportoi se pothuajse 5,000 punonjës në SAIC Motor po jetonin në dhomat e fjetjes të kompanisë (Tesla nuk e ka një hapësirë të tillë).
