Mercedes-Benz ka prezantuar në Javën e Modës në Shangai konceptin Vision Iconic, automjetin e parë që përdor teknologjinë revolucionare “solar paint”, një bojë fotovoltaike që gjeneron energji diellore direkt nga sipërfaqja e makinës. Sipas kompanisë, shtresa mbrojtëse përbëhet nga module nanopartikulare vetëm 5 mikrometra të trasha, të cilat mund të aplikohen mbi trupin e makinës si një pastë ultra e hollë.
Kjo bojë inovative lejon kalimin e 94% të energjisë diellore, duke e shndërruar atë në energji elektrike me efikasitet rreth 20% mbi një sipërfaqe prej 11 m² – ekuivalente me madhësinë e një SUV-i mesatar. Çdo modul peshon vetëm 50 gram për metër katror dhe është më i hollë se një fije floku njerëzor. Mercedes thotë se kjo teknologji mund të prodhojë energji të mjaftueshme për të mbuluar deri në 12,000 km udhëtim në vit në Gjermani ose deri në 20,000 km në kushte diellore si në Pekin. Boja mund të aplikohet në çdo ngjyrë dhe nuk përmban silikon apo materiale të rralla tokësore.
Energjia e gjeneruar ruhet drejtpërdrejt në baterinë e makinës, madje edhe kur ajo është e fikur. Përveç bojës diellore, Vision Iconic integron edhe neuromorphic computing, që redukton konsumin e energjisë për përpunimin e të dhënave me 90%, si dhe sistemin steer-by-wire, që eliminon lidhjen mekanike mes timonit dhe rrotave të përparme për të kursyer hapësirë dhe për të thjeshtuar dizajnin e brendshëm.
Markus Schäfer, anëtar i bordit të Mercedes-Benz Group AG, e përshkroi Vision Iconic si “një pasqyrë të së ardhmes së mobilitetit”, duke theksuar se kombinimi i teknologjive si boja fotovoltaike, drejtimi autonom Level 4 dhe inteligjenca artificiale po vendosin standarde të reja për epokën elektrike dhe digjitale.
