Gjatë kohëve të fundit ne kemi parë disa dizajne mjaft tërheqëse nga Hyundai, ku së fundmi kemi mbetur mjaft të kënaqur me pamjen e jashtme të makinës elektrike Ioniq 5.
Tashmë Hyundai ka prezantuar 2 modele të reja që besohet se do të jenë konceptet më të bukura të prezantuara gjatë këtij viti, RN22e dhe N Vision 74. RN22e është një makinë elektrike e bazuar në trupin e Ioniq 6 ndërsa N Vision 74 është një makinë me hidrogjen e inspiruar nga N 2025 Vision Gran Tourismo dhe koncepti Pony Coupe 1974.
Pony Coupe u dizenjua nga dizenjuesi legjendar Giorgetto Giugiaro. Dhe pse makina nuk u prezantua asnjëherë në treg, ajo tregoi fuqinë novatore të Hyundai. Nga ana tjetër N 2025 Vision Grand Tourismo u prezantua në vitin 2015 dhe ishte modeli i parë i makinave me hidrogjen që u prodhuan në masë.
N Vision 74 vjen me një miksim brilant midis të vjetrës dhe të resë. Me spoiler-in e madh në pjesën e pasme, mbulesat tepër unike të gomave dhe dritat katrore në pjesën e parme dhe të pasme, kjo makinë me siguri do të tërheqë vëmendjen e shumë kalimtarëve.
Gjithashtu N Vision 74 po ndihmon në rikthimin në modë të hidrogjenit. Makinat e fuqizuara nga hidrogjeni kanë një kohë më të shkurtër “karikimi” se makinat me bateri, dhe hidrogjeni mund të shtohet lehtësisht në pikat e karburantit.
