Tony Starku i realitetit Elon Musk njihet për zmadhimin e deklaratave dhe premtimeve megjithatë në shumë ndërmarrje të tijat suksesi nuk ka munguar.
Ndër këto suksese mbetet e vetmja makinë smart e momentit siç është Tesla.

Njëjtë si në një smartphone përditësimi më i fundit në sistemin e Tesla është një funksion i quajtur Smart Summon, (thirrje e zgjuar).
Imagjino të jesh në supermarket, ke një tufë me qese me vete dhe jashtë bie shi, në vend që të bëhesh qull teksa shkon tek makina jotë nëpër parking, është automjeti ai që me një komandë të thjeshtë del nga parkimi dhe vjen të merr tek dera e parkimit.

Një opsion i dobishëm në parking, por nëse një bug në smartphone rregullohet me një të fikur e të ndezur, një automjet shkakton dëme, dhe raste të tilla nuk kanë munguar.
Megjithatë Tesla nuk ka ndërmend ta heqë opsionin, përveçse po punojnë për përmirësimin e tij, Elon Musk deklaron se shumë shpejt makina do të bëjë edhe Reverse Summon, të kundërtën.

Pra do të të lërë në destinacion dhe më pas do të shkojë të gjejë një vend parkimi njëjtë sikur të kishe një shofer.
Pavarsisht sa e bukur duket në teori, praktikisht sfidat janë goxha të mëdha pasi automjeti do të vihej përpara situatave nga më të ndryshme, ku vendim marrja do të sfidonte edhe një mendje njerëzore.

Sidoqoftë një këmbëngulje si ajo e Musk ka treguar shpesh rezultat ndaj le ta mirëpresim të ardhmen.