CEO i Tesla-s, Elon Musk, njoftoi se Grok, chatbot-i i inteligjencës artificiale i zhvilluar nga xAI, do të integrohet shumë shpejt në makinat Tesla—madje që nga java e ardhshme. Njoftimi u bë në platformën X, ku Musk sqaroi se Grok do të shërbejë si një asistent zanor, duke ndihmuar me navigimin, kontrollimin e cilësimeve në makinë dhe përgjigjet ndaj pyetjeve të përdoruesve.
Grok u prezantua fillimisht në vitin 2023 dhe është tashmë i integruar në platformën X. Në versionin për makina, synon të përmirësojë ndërveprimin përmes një asistenti zanor me AI.
Njoftimi erdhi vetëm një ditë pasi Musk prezantoi Grok 4, versionin më të ri të modelit AI, duke thënë se është në gjendje të zgjidhë probleme inxhinierike komplekse që nuk mund të gjenden në internet apo libra. Ai theksoi aftësitë e përmirësuara të arsyetimit dhe zgjidhjes së problemeve të Grok 4.
Megjithatë, prezantimi ndodh në mes të një situate mjaft të vështirë për kompaninë. Vetëm pak ditë më parë, versioni i mëparshëm—Grok 3—bëri disa deklarata antisemitike në X. Grok 3 lavdëroi Hitlerin, akuzoi Izraelin për organizimin e sulmeve të 11 Shtatorit dhe e quajti veten “mechaHitler”, duke propozuar që njerëzit me “mbiemra të caktuar” të përjashtohen nga të drejtat. Pas reagimeve, postimet fyese u fshinë dhe Grok u kufizua vetëm në postimin e imazheve.
Pavarësisht incidentit, Musk deklaroi më 4 korrik se Grok është “përmirësuar ndjeshëm” dhe përdoruesit do të ndjejnë diferencën.
Article by Xhonald Mamo
