BMW po përgatitet për një përmirësim të rëndësishëm në teknologjinë e gjeneratës së ardhshme të baterive për makinat elektrike.
Prodhuesi gjerman i automjeteve pretendon se teknologjia e re do të ofrojë 30% më shumë autonomi, karikim 30% më të shpejtë dhe ndoshta, më e rëndësishmja, me një çmim më të lirë. Me debutimin e saj të parë Neue Klasse, BMW po na jep një pamje më të afërt të baterive dhe sistemeve të lëvizjes elektrike të gjeneratës së re.
BMW zbuloi detaje të reja të platformës së saj 800V që do të mbështesin modelet e ardhshme EV të markave BMW, Mini dhe Rolls Royce. Platforma, e quajtur “Gen6“, është një “hap kuantik përpara” në krahasim me makinat e saj aktuale elektrike. BMW pretendon se sistemi i saj i gjeneratës së gjashtë eDrive do të ofrojë “karikim 30% më të shpejtë dhe autonomi 30% më të madhe”. Disa modele mund të ofrojnë një performancë akoma më të mirë.
“Ne jemi duke udhëhequr rrugën me këtë teknologji të lëvizjes“, mburrej Dr Joachim Post, një anëtar i bordit të BMW. Bateritë e reja NMC kanë qelizat cilindrike Gen6 të BMW-së, të cilat thuhet se ofrojnë 20% densitet më të madh energjie se paraardhësi i tyre, bateria prizmatike Gen5. BMW konfirmoi se do të ofrojë gjithashtu karikim dydrejtimësh si standard në modelet Gen6. Dizajni i tyre më i hollë dhe më efikas e bën më të lehtë paketimin. Më e rëndësishmja, shumica e zhvillimit dhe montimit tani bëhen brenda kompanisë, gjë që do ta ndihmojë BMW-në të ulë në mënyrë drastike kostot e prodhimit.
BMW i4 2024, EV-ja më e shitur e markës luksoze në SHBA vitin e kaluar, ka një autonomi të vlerësuar nga EPA deri në 484 km me karikim të shpejtë (10% deri në 80%) në rreth 31 minuta. Një përmirësim prej 30% sugjeron autonomia do të shkojë në 630 km me karikim të shpejtë në më pak se 22 minuta.
BMW bëri disa përmirësime në motorin elektrik, duke përfshirë një motor të dytë (ASM) që do të vendoset në boshtin e përparmë të modeleve AWD Neue Klasse. Përmirësime të tjera përfshijnë një sistem të ri ftohjeje me ujë dhe vaj, një inverter të integruar dhe shasi të ridizenjuar për të reduktuar peshën.
BMW tha se teknologjia e saj e re redukton humbjet e energjisë me 40%, kostot me 20% dhe peshën me 10% në krahasim me një model Gen5 xDrive.
