YouTube ka zbuluar një shërbim të inteligjencës artificiale që lejon përdoruesit të imitojnë yjet e popit si Demi Lovato dhe John Legend. Funksioni eksperimental, i quajtur Dream Track, i lejon përdoruesit të krijojnë këngë të shkurtra duke përshkruar përmbajtjen e tekstit dhe gjendjen shpirtërore.
Nëntë artistë kanë lejuar që zëri i tyre të “klonohet” nga softueri, duke përfshirë Charli XCX, Troye Sivan, T-Pain dhe Sia. Për momentin, rreth 100 krijuesve në SHBA u është dhënë akses në këtë shërbim, i cili mund të përdoret vetëm në YouTube Shorts – rival i platformës TikTok.
Kompania publikoi dy video demonstruese të krijuara me Dream Track, me imitime të kalueshme, por dukshëm inferiore, të Charlie Puth dhe T-Pain. Kënga Puth u krijua nga prompt-i: “Një baladë për mënyrën se si të kundërtat tërhiqen, akustike optimiste“. Rezultati duket si një MP3 me cilësi të ulët, plot me zhurma dixhitale. Ndonjëherë zëri i Puth-it tingëllon si i turbullt dhe i paqartë.
Në një postim në blog, kreu i muzikës i YouTube tha se mjeti ishte krijuar për të “testuar, mësuar, marrë reagime dhe dëgjuar ide” nga artistët dhe shikuesit. “Në këtë fazë fillestare, eksperimenti është krijuar për të ndihmuar në eksplorimin se si teknologjia mund të përdoret për të krijuar lidhje më të thella midis artistëve dhe krijuesve, dhe në fund, fansave të tyre,” tha Lyor Cohen, i cili më parë ndihmoi në nisjen e karrierës së artistëve si Run-DMC dhe Beastie Boys.
