Meta ka publikuar zyrtarisht një aplikacion të dedikuar për WhatsApp në iPad, më shumë se një dekadë pas prezantimit të shërbimit të komunikimit (në 2009) dhe vetë iPad-it (në 2010). Aplikacioni është tashmë i disponueshëm në App Store dhe ofron shumë nga funksionalitetet që gjenden edhe në versionin për iPhone. Përdoruesit mund të kryejnë telefonata me zë dhe video me deri në 32 persona, të përdorin kamerat e përparme dhe të pasme të pajisjes, si dhe të ndajnë ekranin gjatë thirrjeve.
WhatsApp për iPad përfiton plotësisht nga veçoritë e iPadOS si Stage Manager, Split View dhe Slide Over. Kjo u mundëson përdoruesve ta përdorin WhatsApp krah për krah me aplikacione të tjera, duke bërë të mundur komunikimin gjatë shfletimit në internet apo shikimit të videove—një përmirësim i madh për produktivitetin në krahasim me pajisjet më të vogla.
Më parë, përdoruesit e iPad-it mund ta përdornin WhatsApp vetëm nëpërmjet browser-it ose versioneve për desktop (Mac/PC), të cilat nuk ofronin përvojë të plotë. Kërkesa për një version të dedikuar për iPad ka qenë e lartë prej vitesh. Në vitin 2022, kreu i WhatsApp, Will Cathcart, deklaroi se Meta “do të donte” të krijonte një aplikacion për iPad, duke pranuar interesimin afatgjatë të përdoruesve.
Pak ditë më parë, llogaria zyrtare e WhatsApp në X publikoi një “emoji sysh“, duke dhënë një sinjal të fshehtë për prezantimin, por aplikacioni doli më shpejt nga sa pritej. Ndërkohë, qarkullojnë zëra se Meta po punon edhe për një version të Instagram të optimizuar për iPad, megjithëse ende nuk ka njoftime zyrtare.
