Gjatë muajve të fundit, WhatsApp ka sjellë pranë përdoruesve shërbime të reja shumë të rëndësishme, duke përfshirë këtu links për video-telefonata, mundësinë për t’i dërguar mesazhe vetes si dhe opsionin për të dërguar files me madhësi deri në 2GB. Tashmë platforma po punon për të ofruar një tjetër përmirësim që do ta bëjë regjistrimin dhe shpërndarjen e videove më të thjeshtë.
WABetaInfo ka zbuluar se WhatsApp po punon për të sjellë një ndërfaqje të rifreskuar të kameras brenda në aplikacionin për Android. Aktualisht, nëse ju hapni kameran brenda WhatsApp, do të shikoni një buton rrethor në mes për regjistrimin e fotove, dhe nëse ky buton mbahet shtypur nis regjistrimi i videove. Mirëpo disa herë kjo gjë nuk është shumë praktike, pasi ju duhet të mbani gjatë gjithë kohës shtypur butonin për të vazhduar regjistrimin.
Prandaj WhatsApp ka vendosur të bëjë një ndryshim në këtë drejtim duke shtuar një modalitet të dedikuar për videot në aplikacion, i cili mund të aksesohet përmes një rrëshqitje në ekran. Kjo gjë do ta bëjë regjistrimin e videove në WhatsApp më të thjeshtë. Gjithashtu ju do të keni mundësinë që të ndërroni kameran e parme me ato të pasme gjatë regjistrimit, e cila nuk ka qenë e mundur më parë.
Këto ndryshime janë shfaqur tek përdoruesit e versionit beta 2.22.21.8.
