“Telefoni i prishur” vazhdon të prodhojë keq informim dhe panik ndërsa institucione serioze përpiqen me çdo kusht të minimizojnë dëmet e Covid-19.
E kemi fjalën sigurisht për atë mesazhin copy paste që e ke marrë njëkohësisht nga 7 veta brenda ditës, ku këshillohen receta me uthull e nitrat e lloj lloj idiotësirash si zgjidhje permanente kunder virusit.
Të tilla informacione janë shenjestra më e fundit e WhatsApp, një aplikacion i përdorur nga 2 bilion njerëz, efekti i të cilit është kolosal nëse përdoret keq.
Kompania në pronësi të Facebook ka vendosur që një mesazh i bërë “forward” nga njëri person tek tjetri 5 herë nuk do të kalojë në më shumë se një njeri tjetër më pas.
Pra nëse ti je marrësi i 5-të i këtij mesazhi, nuk do të mundesh ta dërgosh në më shumë se një bisedë tjetër.
Tentativë kjo për të ndaluar lehtësinë me të cilën materiale të tilla mund të qarkullojnë.
Përfaqësues të kompanisë kanë pranuar se vetë opsioni është shumë i rëndësishëm në kushte të tjera, si shpërndarja e memeve apo këngëve, por në ditë pandemie mund të jetë edhe vdekjeprurës.
Facebook dhe kompani të tjera që deri dje pretendonin një qëndrim neutral ndaj përdoruesëve të vet, sot janë bërë pjesë e një fushate botërore kundër keq informimit. Vendim mjaft i domosdoshëm.
