Shpesh herë na ka ndodhur që ne të dërgojmë një mesazh të caktuar drejt një personi të gabuar. Pikërisht në këtë moment është tepër i rëndësishëm shërbimi për fshirjen e mesazheve nga WhatsApp, para se ky person ta shikojë atë. Mirëpo në qoftë se ne fshijmë mesazhin e gabuar nga shpejtësia, ne nuk mund të bëjmë asgjë për të momentalisht.
Prandaj WhatsApp po punon për një tjetër shërbim që t’ju shpëtojë. Së shpejti ju do të keni mundësinë që të riktheni në chat një mesazh të fshirë.
Për herë të parë një shërbim i tillë u raportua në qershor, ku u tregua se WhatsApp po punonte për të rikthyer mesazhet e fshira gabimisht. WABetaInfo zbuloi se ky shërbim tashmë është shpërndarë në disa testues beta të aplikacionit në Android me version 2.22.18.13, mirëpo shërbimi u gjend dhe në versione më të vjetra nga përdorues të ndryshëm. Aktivizimi për më tepër testues beta pritet të vijë në javët në vazhdim.
Pasi ju fshini një mesazh që keni dëguar, do të shfaqet një tabelë e vogël që tregon se mesazhi juaj u fshi, i shoqëruar me një buton Undo që do t’ju ndihmojë të riktheni mesazhin në chat.
Në këtë mënyrë ju do të mund të shpëtoni nëse keni përzgjedhur aksidentalisht “Delete for me” në vend të “Delete for everyone”.
