Në datën 16 nëntor, një përdorues publikoi një reklamë në një komunitet të mirënjohur nga hakerat ku tregonte se kishte nxjerrë në shitje një databazë të këtij viti të 487 milionë përdoruesve të WhatsApp.
Në këtë databazë besohet se gjenden numrat e përdoruesve nga 84 shtete të ndryshme. Përdoruesit më të prekur nga kjo vjedhje masive janë nga SHBA, me mbi 32 milionë numra të publikuara. Të tjera qytetarë të prekur nga kjo vjedhje janë nga Egjipti (45 milionë), Italia (35 milionë), Arabia Saudite (29 milionë), Franca (20 milionë), Turqia (20 milionë), Mbretëria e Bashkuar (11 milionë) dhe Rusia (10 milionë). Në databazë tregohet se gjenden dhe 506,602 numra të qytetarëve shqiptarë.
Personi që ka publikuar këtë databazë ka komunikar me Cybernews dhe ka treguar se shet numrat e qytetarëve amerikanë për $7,000, atyre nga Mbretëria e Bashkuar për $2,500 dhe atyre nga Gjermania për $2,000.
Këto informacione mund të përdoren nga hakera të ndryshëm për të sulmuar smartphone-t tuaj, prandaj Geek Room ju rekomandon të mos i përgjigjeni telefonatave apo mesazheve nga numrat e panjohur.
Cybernews arriti të siguronte një dokument të vogël verifikimi nga hakeri dhe arriti të vërtetonte se të gjithë numrat e dërguar ishin përdorues të WhatsApp.
