WhatsApp ka punuar prej disa kohësh për të sjellë në platformë usernames, për të gjithë personat që nuk dëshirojnë të ndajnë me të tjerët numrin e tyre të telefonit.
Pra, së shpejti përdoruesit do të kenë mundësinë të zgjedhin një emër unik për të komunikuar me të tjerët pa e bërë publik numrin e tyre të telefonit. Në versionin e ri beta të WhatsApp është zbuluar se kompania gjithashtu mund t’i lejojë përdoruesit të vendosin PIN për të ndaluar marrjen e mesazheve dhe ndërveprimeve të padëshiruara.
Kjo gjë u bë e ditur përmes një postimi nga WABetaInfo, ku tregohet se versioni beta 2.24.18.2 në Android i WhatsApp ofron përdorimin e një PIN-i kur vendosni një emër përdoruesi. Në këtë mënyrë, ju do të keni një shtresë ekstra sigurie.
Të gjithë personat që gjejnë emrin tuaj të përdoruesit në WhatsApp do të duhet që të fusin kodin PIN të caktuar nga ju për të filluar një bisedë. Kjo veçori mund ta bëjë më sfiduese ose të pamundur kontaktimin nga persona që kanë qëllime të këqija, pasi do të jeni gjithmonë në gjendje të ndryshoni kodin PIN nëse dikush e poston publikisht.
Duhet të theksojmë se usernames dhe kodet PIN të WhatsApp janë ende në zhvillim e sipër dhe këto veçori nuk janë ende të disponueshme. Si rezultat, nuk dihet se kur dhe nëse kompania do t’i shpërndajë ato drejt përdoruesve të saj.
