Përmes një deklarate për shtyp të publikuar ditën e sotme, Twitter ka bërë të ditur se ka pranuar ofertën prej $44 miliardësh të Elon Musk për të blerë kompaninë. Musk arriti të blejë Twitter me $54.20 për aksion.
“Fjala e lirë është themeli i një demokracie funksionale, dhe Twitter është qyteti dixhital ku çështje jetësore mbi të ardhmen e njerëzve debatohen.” tha Elon Musk në deklaratën për shtyp. “Unë dëshiroj ta bëj Twitter më të mirë se kurrë duke përmirësuar këtë produkt me shërbime të reja, duke bërë algoritmet publikë për të rritur besimin, duke mposhtur bots dhe duke vërtetuar të gjithë humanët.”
CEO i Twitter, Parag Agrawal ka mbështetur këtë marrëveshje duke shkruajtur se “Twitter ka një qëllim dhe rëndësi që prek të gjithë botën”. “Unë jam tepër krenar për ekipet tona dhe tepër i inspiruar nga puna që nuk ka qenë kurrë më e rëndësishme se tani.”
Ishte disi e papritur kjo deklaratë nga ana e bordit të aksionerëve të Twitter, të cilët më parë dëshironin t’i rezistonin blerjes nga Musk duke ndarë aksionet e tyre, për ta bërë më të vështirë blerjen.
Disa nga qëllimet kryesore të Elon Musk janë përfshirja e një butoni edit, i cili është aktualisht në zhvillim e sipër, largimin e reklamave nga Twitter Blue, uljen e çmimit të abonimit dhe pranimin e Dogecoin si një opsion pagese.
