Twitter Inc. ka mbajtur diskutime gjatë muajve të fundit rreth blerjes së Clubhouse, sipas disa personave që kanë njohuri rreth kësaj çështjeje, të cilët nuk dëshironin që emrat e tyre të bëheshin publik. Vlerësimi që ata arritën të bënin për këtë aplikacion kapte shifrat $4 miliardë, megjithatë tani këto diskutime janë ndërprerë dhe arsyet e ndërprerjes nuk janë ende të qarta.
Bloomberg News raportoi gjatë kësaj jave se Clubhouse ishte në kërkim të grumbullimit të fondeve nga investitorët për të njejtën vlerë, pasi diskutimet me Twitter u ndërprenë.
Clubhouse është një rrjet social relativisht i ri, i cili u shfaq rreth 1 vit më parë dhe u shndërrua në një nga platformat më të përdorura në iOS. Mënyra e tyre e funksionimit ka frymëzuar dhe kompanitë e tjera si Facebook, Instagram apo dhe Twitter për të sjellë një shërbim të ngjashëm në platformën e tyre. Shërbimi Spaces i krijuar nga Twitter në 2020, është ende në formë beta dhe jo të gjithë përdoruesit mund të krijojnë ose të marrin pjesë në një diskutim publik.
Të pyetur nga gazetarët, zëdhënësit e Twitter dhe Clubhouse kanë refuzuar të japin të dhëna më specifike.
