Një raportim i ri ka bërë të qartë se përdoruesit nga SHBA dhe Mbretëria e Bashkuar po shpenzojnë më tepër kohë në TikTok se në YouTube. Ky raportim vjen nga kompania që analizon të dhënat e aplikacioneve, App Annie, e cila e karakterizon TikTok si një platformë që e ka zmadhuar fushëpamjen e rrjeteve sociale.
“TikTok ka shpenzuar shumë për të tërhequr përdorues. Tashmë ne dimë se në SHBA dhe në Mbretërinë e Bashkuar, TikTok ka tejkaluar YouTube në renditje, dhe tashmë po i shkon pas Facebook.” tha Jamie MacEwan. Koha e shpenzuar në aplikacion e matur nga App Annie vlen vetëm për adresat e përdorura në smartphone-t Android, dhe vetëm për dy vendet e lartpërmendura.
Megjithatë duhet theksuar se Youtube zë vendin e parë për kohën e shpenzuar në platformë, e cila përfaqëson kohën në përgjithësi dhe nuk është llogaritur për vetëm një përdorues. Kjo gjë ndodh pasi YouTube ka shumë më tepër përdorues aktiv mujor, rreth 2 miliardë në të gjithë botën, ndërkohë që TikTok ka vetëm 700 milionë.
Raportimi i App Annie sugjeron gjithashtu se aplikacionet me shërbimin live streaming, përfshirë këtu dhe TikTok, po gjenerojnë shifra të mëdha parash për krijuesit. Përdoruesit e TikTok mund të blejnë “coins” të aplikacionit dhe përmes tyre ata mund të vlerësojnë krijuesit, duke krijuar një burim të rëndësishëm të ardhurash.
